Aksioni kundër bandës më të madhe kriminale, 64 të vdekur në Rio de Janeiro

Të paktën 64 persona humbën jetën të martën gjatë një operacioni policor në Rio de Janeiro, i cilësuar si më vdekjeprurësi në historinë e qytetit.

Aksioni u zhvillua kundër një bande të madhe kriminale, vetëm disa ditë para se qyteti të presë një sërë ngjarjesh ndërkombëtare të lidhura me përgatitjet për samitin e klimës COP30 të Kombeve të Bashkuara.

Sipas autoriteteve, mes viktimave janë edhe katër oficerë policie. Guvernatori i Rios, Claudio Castro, konfirmoi shifrën e viktimave, e cila është më shumë se dyfishi i numrit të regjistruar në operacionin më vdekjeprurës të mëparshëm të kryer nga policia e qytetit.

Policia e Rios ka një histori të kryerjes së operacioneve të mëdha kundër grupeve kriminale përpara ngjarjeve të rëndësishme ndërkombëtare. Situata të ngjashme janë regjistruar edhe përpara Lojërave Olimpike të vitit 2016, samitit të G20-ës në vitin 2024 dhe samitit të BRICS-it në korrik të këtij viti.

Javën e ardhshme, Rio de Janeiro do të presë samitin global C40 të kryetarëve të bashkive, i fokusuar në ndryshimet klimatike, si dhe ceremoninë e Çmimit Earthshot të Princit William. Në këto ngjarje pritet të marrin pjesë personalitete të njohura, përfshirë këngëtaren Kylie Minogue dhe kampionin katër herë të botës në Formula 1, Sebastian Vettel.

Të gjitha këto aktivitete janë pjesë e përgatitjeve për COP30, samitin e klimës që do të zhvillohet në qytetin brazilian të Belemit, në Amazonë, nga 10 deri më 21 nëntor.