Armëpushimi në Gaza, ministrat e jashtëm të vendeve myslimane takim në Stamboll

Ministri i Jashtëm turk, Hakan Fidan ka deklaruar se Turqia ka marrë iniciativën për organizimin e një takimi të ministrave të jashtëm të vendeve myslimane në Stamboll të hënën. Tema e diskutimit është armëpushimi në Rripin e Gazës dhe hapat e mëtejshëm në enklavën palestineze.

Duke folur në një konferencë për shtyp në Ankara, Fidan theksoi se në takim do të marrin pjesë ministrat e jashtëm të vendeve të përfaqësuara në takimin mbi situatën në Gaza me Presidentin e SHBA-së Donald Trump në Nju Jork më 23 shtator. Në atë takim morën pjesë Turqia, Katari, Arabia Saudite, Egjipti, Emiratet e Bashkuara Arabe, Jordania, Pakistani dhe Indonezia.

Sipas një zëdhënësi të Ministrisë së Jashtme turke, përveç Fidanit, në takimin e së hënës pritet të marrin pjesë edhe ministrat e jashtëm të Emirateve të Bashkuara Arabe, Katarit, Jordanisë, Pakistanit, Indonezisë, Arabisë Saudite dhe Egjiptit, megjithëse pjesëmarrja e tyre ende nuk është konfirmuar.

Ministri turk akuzoi kryeministrin izraelit Benjamin Netanyahu se po kërkon një pretekst për të shkelur armëpushimin në Gaza dhe për të rifilluar gjenocidin para syve të të gjithë botës.

Turqia ka dërguar një ekip prej 81 shpëtimtarësh për të ndihmuar në kërkimin e trupave të varrosur, përfshirë ato të pengjeve izraelite, por ekipi mbetet i bllokuar me pajisjet e tij në Rafah duke pritur lejen nga Izraeli për të hyrë në Gaza.

LEXONI GJITHASHTU:

• Mbarimi i mandatit të Sonila Bejtjas, presidenti hap vakancën në Kushtetuese
• Fatos Nano do të nderohet të dielën me homazhe në Pallatin e Kongreseve