Tiranë/ Goditet rrjeti i shpërndarjes së narkotikëve, vihen në pranga dy vëllezërit

Policia e Tiranës ka finalizuar me sukses operacionin policor të koduar “Bashkëpunimi”, me qëllim goditjen e veprimtarisë kriminale të shpërndarjes së lëndëve narkotike.

Sipas burimeve, dy vëllezër me iniciale D. Ç(S)., 30 vjeç, dhe A. Ç., 38 vjeç, janë vënë në pranga, pasi përdornin një lavazh të marrë me qira në rrugën “Konferenca e Pezës” për të kamufluar aktivitetin e paligjshëm të shpërndarjes së lëndëve narkotike, kryesisht kanabis dhe kokainë.

Në kuadër të operacionit u arrestua gjithashtu shtetasi M. Z., 30 vjeç, i cili dyshohet se kishte dijeni për aktivitetin kriminal të dy vëllezërve, por nuk e kallëzoi atë.

Gjatë kontrollit në ambientet e lavazhit dhe në dy automjetet e përdorura nga të arrestuarit, policia gjeti dhe sekuestroi:

• lëndë narkotike të dyshuar kanabis,

• një sasi kokaine,

• një armë sportive,

• një pajisje për bllokimin e valëve,

• tre aparate celularë,

• një peshore elektronike,

• dhe sende të tjera të kundërligjshme.

Materialet procedurale iu referuan Prokurorisë së Tiranës, për veprime të mëtejshme.