Zv.kryeministri i Malit të Zi: Zgjerimi, politika më e mirë që ka pasur BE-ja

Zëvendëskryeministri i Malit të Zi për Çështjet e Jashtme dhe Evropiane, Filip Ivanoviç gjatë fjalës së tij në Samitin e Euronews u shpreh se vendi i tij ka përparuar në rrugëtimin drejt BE-së falë punës së palodhur dhe përkushtimit politik. Ai theksoi se zgjerimi është politika më e mirë që BE-ja ka pasur ndonjëherë.

Vendi dëshiron të bëhet shteti i 28-të anëtar i BE-së deri në vitin 2028 dhe, sipas raportit të Komisionit Evropian, është në rrugën e duhur për ta arritur këtë qëllim.

“Raporti që sapo morëm është një provë shtesë për planin që kemi pasur si qeveri. Ne duam që secili raport të jetë më i mirë se të tjerët. Ky është raporti më i mirë ndonjëherë”, tha ai.

Ivanoviç më tej u shpreh se zgjerimi është politika më e mirë që BE-ja ka pasur ndonjëherë. Sipas tij zgjerimi do ta transformojë BE-në në një lojtar gjeopolitik. Ai shtoi se Mali i Zi dëshiron të luajë një rol në këtë.

I pyetur për efektin në rajon nëse vendi anëtarësohet në BE, Ivanoviç tha se BE-ja do të konfirmojë besueshmërinë e saj dhe do të vërtetohet se zërat e tjerë gabojnë. Ai pretendon se moslejimi i vendit të tij brenda BE-së do t’u dërgonte një sinjal të keq vendeve të tjera kandidate.

“Për ne, do të ishte një situatë shkatërruese dhe do të ishte një sinjal i tmerrshëm për të gjitha vendet e tjera, sepse ato mendojnë se çfarëdo që bëjnë është e kotë”, tha ai.

Ivanoviç përsëriti se anëtarësimi pa të drejta të plota vote vështirë se do të ishte i pranueshëm.

“Kemi qenë në gjyq për 15 vitet e fundit dhe do të mbetemi në gjyq derisa të mbyllim të gjithë kapitujt e negociatave. Sapo të mbyllim të gjithë kapitujt, për sa më përket mua, gjyqi ka mbaruar”, shtoi ai, duke iu referuar idesë së një “periudhe prove” për vendet kandidate për në BE, sipas së cilës ato do të fitonin anëtarësimin në pritje të konfirmimit përfundimtar.

LEXONI GJITHASHTU:

Presidentja e Moldavisë në Samitin e Euronews: Në vitin 2030 jemi pjesë e BE-së

Mickoski: Zgjerimi i BE-së me vendet e Ballkanit do të thotë ribashkim i Evropës