“Skandal i madh”, deputeti ankohet në parlament për vonesën e Grand Theft Auto VI

Një deputet polak ka tërhequr vëmendjen e mediave duke shprehur “shqetësim” për vonesën e fundit të lojës së shumëpritur Grand Theft Auto VI, e cila është konsideruar si një nga videolojrat më të pritura të dekadës.

Gjatë një seance parlamentare, Witold Tumanowicz, anëtar i partisë opozitare KWiN (Konfederata e Lirisë dhe Pavarësisë), foli për shtyrjen e publikimit të lojës, duke e quajtur situatën një “skandal të madh”.

“Sinqerisht, nëse njerëzit nuk dalin në rrugë për diçka të tillë, nuk e di çfarë do të ndodhë”, tha ai me shaka, duke ngjallur reagime të përziera në media dhe rrjetet sociale.

Disa media polake e kritikuan veprimin e deputetit si një “skenë absurde”, ndërsa përdoruesit e rrjeteve sociale e komentuan me humor.

Një deputet tjetër, nga Partia Ligj dhe Drejtësi, Paweł Szrot, mbështeti kolegun e tij dhe e theksoi situatën me ironi: “Shpresoj që shtesa për Bannerlord të mos vonohet më tej.”

Grand Theft Auto (GTA) është një seri videolojërash me temë gangsterësh e njohur globalisht për personazhet e saj të ndërtuar mirë, ambientet realiste dhe përmbajtjen e fuqishme, duke u kthyer në një ikonë të kulturës pop.

Seria ka filluar në vitin 1997 dhe ka shitur mbi 450 milionë kopje.

GTA VI, e cila fillimisht ishte parashikuar që të dilte në vjeshtën e vitit 2025, është shtyrë tashmë dy herë ndërsa mendohet që do të dalë në vitin 2026.

Rockstar Games shpjegoi se shtyrja është e nevojshme për t’i dhënë zhvilluesve kohën për të përfunduar lojën me nivelin e cilësisë që fansat presin dhe meritojnë.

Kapitulli i mëparshëm, GTA V, është publikuar 12 vjet më parë, gjë që shpjegon pritjen e madhe dhe entuziazmin për titullin e ri.