PD protestë para Kryeministrisë, çfarë pritet të ndodhë

Partia Demokratike këtë të hënë do të zhvillojë një protestë para Kryeministrisë. Protesta do të nisë në orën 18:00. Protesta, sipas Sali Berishës, do të ketë tre objektiva kryesore, dorëheqjen e tre ministrave për shkak të skandaleve të javëve të fundit. Hapi final është largimi i qeverisë Rama, ku sipas Berishës përgjegjësi kryesor është vetë kryeministri.

Protesta do të pasohet nga një foltore që do të zhvillohet çdo një javë para kryeministrisë, ku do të mbahen fjalime nga qytetarët dhe deputetët. I pyetur nga gazetarët nëse protesta para Kryeministrisë ka lidhje me thirrjen e tij nga SPAK për 21 janarin, Berisha e mohoi.

Për shkak të protestës do të ketë bllokim të lëvizjes së automjeteve në bulevardin “Dëshmorët e Kombit”, nga kryqëzimi afër Ministrisë së Brendshme deri te sheshi “Nënë Tereza”, si dhe në rrugët “Ukraina e Lirë”, “Papa Gjon Pali II” dhe “Ismail Qemali”. Bllokimi do të nisë nga ora 15:00.

Kjo protestë vjen në një kohë kur Berisha është thirrur në SPAK për t’u pyetur si person që ka dijeni për ngjarjet e “21 Janarit”. Berisha pritet të pyetet të mërkurën, në orën 09:00, në SPAK, pasi data është afruar për shkak të angazhimeve të tij jashtë vendit.

LEXONI GJITHASHTU:

• “Rinasi ka nevojë për analizë”, Proda-Balliut: Nuk përbalt dot policinë për individë
• Mësohet dita kur Berisha do të paraqitet në SPAK për 21 janarin