Tabaku ndërpret mbledhjen: S’diskutojmë buxhetin pa ardhur ministrja e Shëndetësisë

Komisioni për Mediat dhe të Drejtat e Njeriut u mblodh sot për të shqyrtuar buxhetin e vitit të ardhshëm për sektorët e Shëndetësisë dhe Mbrojtjes Sociale, me fokus te: Barazia Gjinore; Agjencia Shtetërore për Mbrojtjen e të Drejtave të Fëmijëve dhe Shërbimi Social Shtetëror.

Mbledhja u ndërpre nga kryetarja e Komisionit, deputetja e PD-së, Jorida Tabaku, pas mungesës së Ministres së Shëndetësisë dhe Çështjeve Sociale.

“Edhe në kohën e buxhetit shohim se ministrja nuk vjen. E kuptoj që është e re në detyrë dhe ka një sektor problematik, por duhet të respektojë Kuvendin dhe buxhetin”, u shpreh Tabaku me keqardhje.

Ministria ishte përfaqësuar vetëm nga zëvendësministrat, por Kryetarja e Komisionit këmbënguli se tema kërkonte patjetër praninë e vetë ministres Sala.

“Është njësoj sikur në një projektligj të propozuar nga ministria të vijnë drejtorët dhe jo ministri apo zëvendësministrat. Këtu flasim për buxhetin”, theksoi ajo.

Në mungesë të ministres, Tabaku mbylli mbledhjen dhe kërkoi që diskutimi të vijojë vetëm në prani të saj, duke nënvizuar rëndësinë e llogaridhënies institucionale, sidomos në procesin e buxhetimit.

LEXONI GJITHASHTU:

• Tabaku i kërkon Peleshit përsëritjen e seancës së programit: Mos e mbani këtë njollë
• A do kandidojë për bashkinë e Tiranës? Përgjigjet Jorida Tabaku