Vlorë, pezullohen mjetet e lundrimit për 24 orë për shkak të kohës së keqe

Kapiteneria e portit detar të Vlorës për shkak të kohës së keqe dhe detit me dallgë ka pezulluar lundrimin për 24 orët e ardhshme.

Sipas njoftimit të kapitenerisë në Vlorë duke filluar prej orës 10:00 të mëngjesit të kësaj të marte dhe deri në orën 06:00 të mëngjesit të së mërkurës do të ket pezullim të lundrimit. Mjetet e vogla lundruese dhe ato të peshkimit nuk do të lejohen të lundrojnë brenda apo jashtë gjirit të Vlorës.

Pezullimi i lundrimit është shkaktuar nga era e fortë bregdetare që ka prekur qytetin. Erërat e forta me shpejtësi në jug-juglindje të cilat arrinë në shpejtësinë 10-15 metër për sekond, kanë bërë që në gji dallgët të shkojnë deri në 1 metër lartësi dhe jashtë gjirit deri në 1.5 metër lartësi, duke e bërë të pamundur lundrimin e këtyre mjeteve.

Bëhet me dije se trageti i linjës me brindisin do të vijoj lundrimet në normalitet të plotë, pasi ky traget përballon një forcë deti më të madhe se kaq, sipas kapitenerisë së Vlorës.

Ndërkohë, për të shmangur të papriturat në bregdet dhe dëmet materiale, kapiteneria i ka bërë thirrje drejtuesve të mjeteve lundruese dhe atyre të peshkimit ti sigurojnë mjetet në bregdet dhe mos të dalin për lundrim pasi koha e keqe rrezikon dhe jetën e tyre.

Administratorët kanë nisur që të sigurojnë varkat e peshkimit në bregdet për të shmangur përplasjen e tyre me kalatat e portit. Sipas njoftimit kushtet hidrometerologjike pritet të përmirësohe pas orës 06:00 të mëngjesit të ditës së mërkurë.

LEXONI GJITHASHTU:

• Moti i keq në vend, Ministria e Mbrojtjes: Si paraqitet situata sipas qarqeve
• Hapen rrugët e bllokuara nga moti i keq në Elbasan, vijon mungesa e energjisë