U ekzekutua me 2 plumba në kokë, autorët u siguruan që biznesmeni u vra

Biznesmeni Mondi Mëhalla ka ndërruar jetë mbrëmjen e kësaj të diele pasi u ekzekutua nga persona të paidentifikuar pranë biznesit të tij. Mësohet se ai ka marrë dy plumba në kokë.

Ai është qëlluar ndërsa ndodhej në makinë në biznesin e tij. Viktima njihet me dy emra Edmond Hyka ose Mondi Mëhalla 43 vjeç. E gjithë zona është e survijuar nga kamera dhe qarkullimi kur ka ndodhur krimi ka qenë shumë i lartë.

Atentati duket se ka qenë i mirë-organizuar, pasi atentatorët janë larguar pasi janë bindur që personi që ishte objektivi ka ndërruar jetë. Lidhur me ngjarjen ka reaguar edhe policia e cila raporton se vrasja ka ndodhur në lagjen “Emin Matraxhiu”. Viktima është gjetur brenda në një automjet të parkuar.

“Elbasan / Informacion paraprak. Rreth orës 20:35, është marrë njoftim se në lagjen “Emin Matraxhiu”, brenda në një automjet të parkuar, është gjetur, i vrarë me armë zjarri, shtetasi M. M. alias E. H., 43 vjeç.

Në vendngjarje shkuan menjëherë shërbimet e Policisë dhe janë ngritur pika kontrolli në dalje të qytetit, dhe vijojnë kontrollet në zonë e në ambiente të ndryshme, për kapjen e autorit/ëve.

Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorit/ëve”, njofton policia.

LEXONI GJITHASHTU:

• Autorët qëlluan në drejtim të makinës, biznesmeni u vra pranë karburantit të tij
• Vrasja e biznesmenit në Elbasan, gazetarja jep detaje: Dyshohet për larje hesapesh