Djali i El Chapos gati të ndryshojë deklaratën e tij në gjykatën amerikane

Një gjykatë federale në Çikago tha se sot do të mbahet një seancë dëgjimore ku djali i bosit të drogës meksikan të burgosur Joaquin El Chapo Guzmán, Joaquín Guzmán López, pritet të ndryshojë deklaratën e tij në një rast trafikimi droge në SHBA, muaj pasi vëllai i tij u deklarua fajtor për akuza të ngjashme.

Guzman Lopez, një nga katër djemtë e udhëheqësit të burgosur të kartelit Sinaloa, El Chapo, fillimisht u deklarua i pafajshëm pas arrestimit të tij vitin e kaluar në Teksas, raporton Reuters.

Joaquin Guzmán López dhe një tjetër udhëheqës i hershëm i Sinaloa-s, Ismael El Mayo Zambada, u arrestuan në korrik 2024 në Teksas, pasi zbarkuan në SHBA me një aeroplan privat.

Të dy më parë kanë deklaruar se nuk janë fajtorë për akuza të ndryshme për trafik droge, pastrim parash dhe posedim të armëve të zjarrit.

Ovidio Guzman Lopez, një tjetër djalë i El Chapo-s, u deklarua fajtor në një gjykatë amerikane në korrik për dy akuza për shpërndarje droge dhe dy akuza për pjesëmarrje në një sipërmarrje kriminale të vazhdueshme, dhe përballet me një dënim të mundshëm me burgim të përjetshëm.

Ai u arrestua në janar 2023 në Culiacan, në shtetin meksikan të Sinaloa, kur të paktën 29 persona u vranë, sipas një deklarate nga autoritetet meksikane, dhe u ekstradua në SHBA disa muaj më vonë.

Babai i tyre, Joaquin El Chapo Guzmán, po vuan një dënim me burgim të përjetshëm në SHBA pasi u shpall fajtor për trafik droge dhe pastrim parash në vitin 2019.

LEXONI GJITHASHTU:

• “El Chapo junior” në mbrojtjen e SHBA, “zhduket” djali i trafikantit famëkeq
• Akuzohet për trafik droge sintetike, djali i El Chapo deklarohet i pafajshëm