“Spermatozoidë të ngordhur”, poçari nga Korça mesazh goditës për shoqërinë shqiptare

Një ndër mjeshtrit e përpunimit të baltës në Korçë ka zgjedhur një formë revoltimi ndaj sjelljes së shoqërisë shqiptare në raport me politikën, duke e quajtur veprën e tij të fundit “Spermatozoidët”.

Indinjata e tij lidhet me situatën aktuale të shoqërisë shqiptare dhe sjelljes së qytetarëve ndaj klasës politike.

“Është një instalacion, ‘Spermatozoidët’, por janë të pafekonduar, të shurdhuar, ata që dalin jashtë përdorimit e shkojnë në kutia dhe hedhin votën pa e menduar fare. Ky ishte qëllimi. Shikoj këtë popull, pa tru në kokë, i sheh zgjedhjet si një ndeshje futbolli”, thotë Vasillaq Kolevica.

66-vjeçari, i cili ka një jetë të tërë duke trajtuar baltën për ta kthyer në art, tregon se këtë herë nuk bëri vetëm një apo dy punime, por shumë, pasi kështu e sheh shumicën e shoqërisë shqiptare sot.

“Kështu janë shumica që kanë ngelur. Të hedhur kot, të paplotësuar që nuk krijojnë fetus. Edhe këtë instalacion ku ta bëj pa një mbështetje financiare. Këta, edhe po të marrin vesh qëllimin, nuk të financojnë, nuk të japin asgjë. Duhet të rrijë në një ekspozitë; artisti, po nuk ia demonstroi artdashësve, çfarë mbështetje, këta të vënë shkopinj nëpër këmbë”, thotë ai.

Vasillaq Kolevica njihet si një nga mjeshtrit e fundit dhe më të mirë të punimit të baltës në Shqipëri, ndërsa ka fituar çmime kombëtare dhe ndërkombëtare.