Nga 19 shtete në 30, do të zgjerohet lista e vendeve që u ndalohet udhëtimi në SHBA

Sekretarja e Sigurisë Kombëtare të SHBA-së, Christie Noem tha të enjten se administrata e presidentit republikan Donald Trump po përgatitet të zgjerojë listën e vendeve që i nënshtrohen një ndalimi udhëtimi, e cila do të rritet nga 19 që është sot në më shumë se 30.

“Nuk do të jem specifik për numrin, por është mbi tridhjetë dhe presidenti vazhdon të vlerësojë vendet”, tha ajo.

Noem nuk sqaroi se cilat vende planifikohen të shtohen në listën e zezë. Autoritetet  amerikane njoftuan në fund të nëntorit se do të rivlerësojnë të gjitha kartat e gjelbra që u kanë dhënë shtetasve të vendeve që i konsiderojnë si rrezik për sigurinë pas sulmit në Uashington kundër anëtarëve të Gardës Kombëtare.

USCIS tha se do të vendoste kufizime vizash për shtetasit e 19 vendeve. Shtetet në këtë listë janë Afganistani, Mianmari, Çadi, Kongo-Brazzavili, Guinea Ekuatoriale, Eritrea, Haiti, Irani, Libia, Somalia, Sudani, Jemeni, Burundi, Kuba, Laosi, Sierra Leone, Togo, Turkmenistani dhe Venezuela.

Ky vendim erdhi pas sulmit ndaj Gardës Kombëtare pranë Shtëpisë së Bardhë ku humbi jetën një person. Presidenti Trump, e denoncoi aktin “terrorist”, duke premtuar se do ta ashpërsojë më tej politikën e tij anti-emigracion pas sulmit.

LEXONI GJITHASHTU:

• Messi: Mund ta humbas Kupën e Botës në vitin 2026
• Frika nga sulmet amerikane, Maduro shton masat për sigurisë e tij personale