Trump: Drogat që hyjnë nga deti në SHBA ranë 94%, së shpejti operacioni tokësor

Presidenti i SHBA-së, Donald Trump, tha të shtunën se drogat e paligjshme që hyjnë në vend nga deti kanë rënë me 94% dhe njoftoi plane për të filluar operacione të ngjashme në tokë.

“Po përpiqem të kuptoj se kush janë 6% e tjerë, sepse sinqerisht, mendoj… ata duhet të jenë njerëzit më të guximshëm”, tha ai në Uashington në darkën e nderimit të Qendrës Kennedy të Departamentit të Shtetit, duke iu referuar atyre që ende përpiqen të sjellin drogë në vend.

Trump tha se një proces i ngjashëm do të fillojë në tokë, duke deklaruar: “Ne e dimë çdo rrugë, ne e dimë çdo shtëpi, ne e dimë se ku jetojnë ata. Ne dimë gjithçka rreth tyre”, u shpreh ai.

Ndërkohë, kritikët pohojnë se Trump tenton të shpikë ose të ekzagjerojë shifrat me qëllim që të rrisë reputacionin e tij.

Trump e përshkroi trafikun e drogës si “një luftë të tmerrshme”, duke sugjeruar se 300,000 njerëz u vranë nga drogat ilegale vitin e kaluar dhe duke u zotuar të mos e lejojë që kjo të ndodhë.

Që nga shtatori, SHBA-të kanë kryer të paktën 22 sulme si në Detin e Karaibeve ashtu edhe në Oqeanin Paqësor Lindor ndaj anijeve të dyshuara për transportimin e narkotikëve, duke vrarë të paktën 87 persona. Anëtarët e Kongresit kanë vënë në pikëpyetje efektivitetin e sulmeve, si dhe ligjshmërinë e tyre, pasi administrata nuk ka paraqitur prova se anijet në të vërtetë transportonin drogë dhe ata që ishin në bord u vranë pa u dhënë mundësia të provonin pafajësinë e tyre.

LEXONI GJITHASHTU:

• Persona të armatosur grabisin një ekspozitë në Brazil, vidhen 13 vepra
• A mundet Evropa ta bindë Kinën të ndihmojë në përfundimin e luftës në Ukrainë?