Pas bombardimeve, banorët e Gazës në mëshirë të përmbytjeve

Mbi 800 mijë banorë të Gazës po përballen me shira dhe përmbytje, teksa stuhia dimërore po kalon përgjatë Rripit.

Shirat e dendura kanë përmbytur kampe strehimi dhe kanë shkaktuar shembjen e shumë ndërtesave.

Familjet e ndodhura në çadra janë pa shtëpi, pasi u janë shkatërruar nga lufta dhe po presin që të nisë procesi i rindërtimit.

“Po bëjmë një jetë të poshtëruar. Na duhen ndihma. Duam që shtëpitë tona të rindërtohen. Çdo ditë unë ulem dhe qaj për fëmijët e mi”, ka deklaruar një grua.

Dy muaj nga armëpushimi i imponuar nga Shtetet e Bashkuara, Gaza ka mbetur e bllokuar në fazën e parë të planit të Donald Trump për paqen, me territorin e saj të ndarë mes palëve në luftë dhe me banorët e saj të zhvendosur e të rrethuar nga rrënojat.

Planet për shtëpi të reja dhe një qeveri të re janë në fazën e ardhshme të marrëveshjes së paqes, që ka ngrirë si pasojë e kërkimeve për pengun e fundit izraelit, Ran Gvili.

Kryeministri izraelit Benjamin Netanyahu ka insistuar se Hamasi duhet të kthejë të gjitha pengjet, të gjallë apo të vdekur, përpara se të lëvizet në fazën më të vështirë.

Por, pavarësisht kërkimeve të shumta të bëra nën rrënojat e Gazës nuk është gjetur asnjë gjurmë e Gvilit, një oficer policie që u rrëmbye gjatë sulmit të 7 tetorit 2023, teksa po rikuperohej nga një lëndim në shpatull.

LEXONI GJITHASHTU:

• Betlehemi ndez pemën e Krishtlindjeve për herë të parë që nga nisja e luftës në Gaza
• Izraeli miliarda dollarë shpenzime ushtarake pavarësisht armëpushimit në Gaza