Bisedime në Berlin: A do të heqë dorë Zelenskyy nga anëtarësimi i Ukrainës në NATO?

Presidenti Volodymyr Zelenskyy është i përgatitur të heqë dorë nga anëtarësimi në NATO nëse ka garanci sigurie. I dërguari i SHBA-së Steve Witkoff dhe dhëndri i Presidentit të SHBA-së Trump, Jared Kushner, janë gjithashtu të pranishëm në takimin e madh të Berlinit mbi luftën në Ukrainë.

Presidenti ukrainas Volodymyr Zelenskyy dhe të dërguarit e SHBA-së mbërritën në Berlin të dielën për një raund tjetër bisedimesh që synojnë negociimin e përfundimit të luftës në Ukrainë.

I dërguari special i Presidentit të SHBA-së, Donald Trump, Steve Witkoff dhe dhëndri i Trump, Jared Kushner, u panë duke hyrë në një hotel në qendër të Berlinit të dielën pasdite.

Në prag të bisedimeve të reja mbi planin e paqes të SHBA-së, Presidenti Zelenskyy nuk këmbënguli që Ukraina të bashkohej me NATO-n. Kur u pyet nga gazetarët, ai shpjegoi se kjo dëshirë nuk mbështetej nga të gjitha shtetet aleate. Si një kompromis, ai do të merrte në konsideratë garanci të krahasueshme sigurie nga BE dhe SHBA.

Ai u tha gazetarëve të dielën se çdo plan do të përfshinte lëshime, por Ukrainës i duheshin garanci sigurie nga SHBA-të dhe Evropa, të ngjashme me Nenin 5 të NATO-s për ndihmën e ndërsjellë. “Po flasim për garanci dypalëshe sigurie midis Ukrainës dhe SHBA-së – përkatësisht garanci të ngjashme me Nenin 5 – si dhe garanci sigurie nga partnerët tanë evropianë dhe vende të tjera si Kanadaja, Japonia dhe të tjera”, tha Zelenskyy.

Takim me udhëheqësit e NATO-s dhe zyrtarët e BE-së

Të hënën, Zelenskyy do të pritet nga kancelari gjerman Friedrich Merz dhe nga shumë krerë shtetesh dhe qeverish evropiane, si dhe nga udhëheqës të BE-së dhe NATO-s që do të bashkohen në bisedime në mbrëmje.

Në mesazhet audio në përgjigje të pyetjeve të gazetarëve në një grup bisedash në WhatsApp të dielën, Zelensky konfirmoi se do të takohej veçmas me kancelarin gjerman Friedrich Merz dhe ndoshta edhe me krerë të tjerë shtetesh dhe qeverish evropiane më vonë atë mbrëmje. Ai gjithashtu deklaroi se ende nuk kishte marrë një përgjigje nga SHBA-të për propozimet e fundit të Ukrainës mbi planin e paqes .

Uashingtoni ka kaluar muaj duke u përpjekur të ndërmjetësojë midis kërkesave të të dyja palëve, ndërsa Trump po shtyn për një përfundim të shpejtë të luftës së Rusisë dhe është gjithnjë e më i frustruar nga vonesat. Kërkimi për kompromise të mundshme është përballur me pengesa të rëndësishme, duke përfshirë kontrollin mbi rajonin lindor ukrainas të Donetskut, i cili është kryesisht i pushtuar nga forcat ruse, si dhe garancitë e sigurisë për Ukrainën.

Presidenti i SHBA-së, Trump, kohët e fundit rriti presionin mbi Zelenskyn. Ai tha se duhet “më në fund të ecë përpara dhe të bëjë lëshime kur humbet – sepse Ukraina po humbet”.

Rusia mbetet e vendosur në kërkesat e saj

Ndërkohë, presidenti rus Vladimir Putin po kërkon që Ukraina të tërheqë trupat e saj nga pjesa e rajonit të Donetskut që është ende nën kontrollin e saj dhe të heqë dorë nga përpjekjet e saj për t’u bashkuar me NATO-n – ky është një nga kushtet kryesore të Rusisë për paqe.

Këshilltari i Putinit për politikën e jashtme, Yuri Ushakov, i tha të përditshmes së biznesit Kommersant se njësitë e policisë dhe të gardës kombëtare ruse do të mbeten në pjesë të rajonit lindor të Ukrainës, Donbas, edhe nëse ato shpallen zonë e çmilitarizuar si pjesë e një plani të mundshëm paqeje. Kjo kërkesë ka të ngjarë të refuzohet nga Ukraina, ndërsa negociatat e udhëhequra nga SHBA-të zvarriten.

Ushakov paralajmëroi se kërkimi i një kompromisi mund të zgjasë shumë, duke vënë në dukje se propozimet e SHBA-së, të cilat kishin marrë parasysh kërkesat ruse, ishin “përkeqësuar” nga ndryshimet e propozuara nga Ukraina dhe aleatët e saj evropianë.

Në komentet e transmetuara në televizionin shtetëror rus të dielën, Ushakov tha se “kontributi i ukrainasve dhe evropianëve në këto dokumente nuk ka gjasa të jetë konstruktiv” dhe paralajmëroi se Moska do të ngrinte “kundërshtime shumë të forta”.

Ushakov shtoi se çështja territoriale ishte diskutuar në mënyrë aktive në Moskë kur Witkoff dhe Kushner u takuan me Putinin në fillim të këtij muaji. “Amerikanët e dinë dhe e kuptojnë qëndrimin tonë”, tha ai.

Merz, i cili së bashku me Presidentin Francez Emmanuel Macron dhe Kryeministrin Britanik Keir Starmer, po udhëheq përpjekjet evropiane për të mbështetur Ukrainën, tha të shtunën se “dekadat e ‘Pax Americana’ (e përkthyer: paqja amerikane) kanë mbaruar kryesisht për ne në Evropë dhe për ne në Gjermani”.

Merz paralajmëroi se qëllimi i Putinit është “një ndryshim themelor i kufijve në Evropë, rivendosja e Bashkimit të vjetër Sovjetik brenda kufijve të tij”. “Nëse Ukraina bie, ai nuk do të ndalet”, tha Merz të shtunën gjatë një konference partie në Mynih.

Putini ka mohuar vazhdimisht se ka plane për të rivendosur Bashkimin Sovjetik ose për të sulmuar aleatët evropianë.

LEXONI GJITHASHTU:

• Planifikonin sulm terrorist në një treg Krishtlindjeje, 5 të arrestuar në Gjermani
• Dhuroi tanke për Ukrainën, Kroacia blen Leopardë të prodhuar në Gjermani