Berat/ Ish-kreu i SHISH dhe djali i tij dënohen për nxjerrje të sekretit shtetëror

Gjykata e Shkallës së Parë pranë Juridiksionit të Përgjithshëm në Berat shpalli fajtor ish-drejtuesin e Shërbimit Informativ Shtetëror (SHISH), P.Sh., dhe djalin e tij, A.Sh., për veprime të ndryshme penale, pas kërkesës së Prokurorisë së Beratit.

Sipas vendimit të gjykatës, P.Sh. u gjet fajtor për “Organizimin ose ushtrimin e veprimtarive të lojërave të fatit në kundërshtim me ligjin” dhe u dënuar me 2 vite burg, duke u ulur dënimi me një të tretën, përfundimisht 1 vit e 4 muaj, me pezullim të ekzekutimit të vendimit dhe vendosje në provë për 2 vite e 8 muaj.

Ndërkohë, A.Sh. u gjet fajtor për dy vepra penale: “Mbajtja pa leje dhe prodhimi i armëve, armëve shpërthyese dhe i municionit” dhe “Tregimi i sekretit shtetëror nga personi që i është besuar”. Dënimi i tij total përfundimtar është 1 vit e 4 muaj burg, me pezullim të ekzekutimit dhe vendosje në provë për 2 vite e 8 muaj. Gjykata gjithashtu i hoqi të drejtën për të ushtruar funksione publike për 5 vjet.

Hetimet zbuluan se në një lokal në lagjen “30 Vjetori” në Berat, i drejtuar nga P.Sh., po zhvilloheshin lojëra fati online. Gjithashtu, gjatë kontrollit të banesës së A.Sh., u gjetën armë dhe municion, si dhe dy USB me dokumente të klasifikuara si “sekret”, të cilat ishin marrë pa autorizim.

Prokuroria theksoi se marrja dhe ruajtja e këtyre materialeve nga A.Sh., pas largimit nga detyra, përbën shkelje të sigurisë së informacionit të klasifikuar.

Gjykata vendosi që të dy të pandehurit të jenë nën mbikëqyrje gjatë periudhës së provës dhe të respektojnë kushtet e vendosura.

LEXONI GJITHASHTU:

• Betohet kryetari i Bashkisë së Beratit, Ceca: Mandati im për t’i shërbyer qytetarëve
• Plagosje në Berat, 37-vjeçari përfundon në spital! Autorët në kërkim