Si nisi sherri mes të miturve në shkollën jopublike në Sarandë, detajet

Një grindje banale mes dy nxënësve ndodhi mëngjesin e së mërkurës në shkollën jopublike “Dea 2002” në qytetin e Sarandës duke përfunduar me plagosjen e njërit prej tyre.

Ngjarja u regjistrua në oborrin e shkollës ende pa nisur procesi mësimor. Mësohet se 13-vjeçari E.G është grindur fillimisht me fjalë me 15-vjeçarin R.H, me pretendimin se kush i kishte zënë rrugën njeri-tjetrit.

Pas grindjes me fjalë 13-vjeçari E.G nxori një thikë që e kishte me vete, goditi në qafë 15-vjeçarin R.H dhe u largua menjëherë nga shkolla.

Pas njoftimit policia shkoi në vendngjarje dhe nisi hetimet për të zbardhur shkakun e kësaj ngjarjeje. Njëherazi po punon për kapjen e 13-vjeçarit E.G.

Sipas bluzave te bardha 15-vjeçari ka mbërritur në spital me tre plagë të shkaktuara me mjet prerës, dy plagë në shpatull dhe një në vesh. Pasi ka marrë mjekim i mituri është larguar nga spitali.