Maduro: Venezuela do vazhdojë tregtinë e naftës pavarësisht bllokadës së Trump

Presidenti i Venezuelës, Nicolas Maduro, tha sot se vendi do të rifillojë tregtinë e naftës, një ditë pasi Presidenti i Shteteve të Bashkuara, Donald Trump, njoftoi një “bllokadë” të cisternave të naftës të sanksionuara që hyjnë ose dalin nga Venezuela.

Maduro tha se qëllimi i Trump është të ndryshojë regjimin në Venezuelë dhe tha se kjo nuk do të ndodhë, shkruan ABC.

Ai theksoi se nafta dhe burimet natyrore, sipas kushtetutës, i përkasin popullit të Venezuelës.

Të martën, Trump njoftoi në rrjetin e tij social “një bllokadë të plotë dhe totale të të gjitha cisternave të naftës të sanksionuara që hyjnë dhe dalin nga Venezuela” dhe kërkoi kthimin e naftës dhe pronës që ai pretendon se i janë sekuestruar më parë Shteteve të Bashkuara.

Ai nuk specifikoi se për cilën pronë bëhet fjalë në kërkesë.

Qeveria e Venezuelës e vlerësoi deklaratën e Trump si një “kërcënim të pamatur dhe serioz” dhe tha se njoftime të tilla shkelin ligjin ndërkombëtar, tregtinë e lirë dhe lirinë e lundrimit.

Ajo njoftoi se ambasadori i saj në Kombet e Bashkuara do të vazhdojë të dënojë ato që i quajti shkelje të së drejtës ndërkombëtare dhe i bëri thirrje bashkësisë ndërkombëtare të refuzojë njoftimin e Trump.

LEXONI GJITHASHTU:

• Maduro thotë se Trump dëshiron naftën e Venezuelës, a është ky qëllimi i SHBA-së?
• SHBA vendos sanksione të reja ndaj familjes së Presidentit venezuelian, Maduro