Përplasjet në Kuvend/ Peleshi: E kemi detyrim të bashkëpunojmë, jo të krijojmë kaos

Pas debateve dhe përplasjeve të ndodhura në seancën plenare të ditës së sotme, Kryetari i Kuvendit Niko Peleshi ka reaguar nëpërmjet një postimi kur shkruan se përtej debateve që shkëmbehen në Parlament, bashkëpunimi mes njëri-tjetrit është një detyrim.

Peleshi nënvizon se forcat politike nuk duhet të mendojnë dhe veprojnë si një e vetme, dhe të ruhen institucionet e vendit si një vlerë e përbashkët.

“Kuvendi i Shqipërisë nuk është thjesht një vend debatesh, por institucioni ku fjala dhe sjelljet e deputetëve duhet të mbajnë e dëshmojnë peshën e përgjegjësisë dhe t’u shërbejnë mirëkuptimit, jo përçarjes. Çdo sjellje që shkel etikën, respektin dhe rregullat e funksionimit të Kuvendit dëmton rëndë dinjitetin, cënon përfaqësimin dhe besimin e qytetarëve. Detyrimi ynë është të bashkëpunojmë për zgjidhje në të mirë të vendit, të zhvillojmë dialog serioz, jo të krijojmë kaos.

Mbi interesin politik qëndron interesi i shtetit. Asnjë forcë politike nuk mund të pretendojë se përfaqëson e vetme të vërtetën dhe asnjë ndarje partiake nuk duhet të na bëjë të harrojmë se të gjithë shërbejmë për të njëjtin vend dhe për të njëjtët qytetarë. Institucionet e Republikës janë vlerë e përbashkët, jo arena për beteja personale apo partiake. Ruajtja, forcimi dhe respektimi i tyre është përgjegjësi që na bashkon përtej ndarjeve tona politike. Vetëm kur e vëmë shtetin mbi partinë, mund të ndërtojmë një Shqipëri më të fortë për brezat që vijnë. Respekti për Kuvendin është respekt për Republikën, respekt për qytetarët.

Mirënjohje për punonjësit e Gardës së Republikës dhe të shërbimeve të Kuvendit, për korrektesën dhe përgjegjësinë në kryerjen e detyrës”, shkruan kreu i Kuvendit, Niko Peleshi.

LEXONI GJITHASHTU:

• Takoi Thaçin në Hagë, Rama: Po luhet teatri i turpit të drejtësisë ndërkombëtare
• Ilir Meta në SPAK, dëshmon për 21 janarin