Rojet kufitare ruse hyjnë në territorin e Estonisë, alarm në vendin baltik

Tre roje kufitare ruse hynë përkohësisht në territorin e Estonisë në ditët e fundit, duke vënë në alarm autoritetet e shtetit baltik.

Lajmin e ka bërë të ditur Ministria e Jashtme në Talin, e cila ka publikuar disa pamje filmike që tregojnë tre persona që kalojnë vijën ndarëse në lumin Narva, që ndan dy vendet.

Incidenti ndodhi në orët e paradites, kur tre oficerët kaluan vijën kufitare pranë fshatit Vasknarva në këmbë. “Por prania e tyre nuk e kërcënoi kurrë sigurinë e vendit tonë”, deklaroi ministri i Brendshëm eston, Igor Taro.

Megjithatë, incidenti ka bërë që policia dhe rojet kufitare të rrisin ndjeshëm praninë e tyre dhe patrullimin e zonës. Ministria e Jashtme estone njoftoi se kishte thirrur për sqarim ambasadorin rus në Talin.

Pasi kaluan ilegalisht kufirin, ushtarët u kthyen në mjetin e tyre lundrues dhe u drejtuan për në bregun rus të  lumit.

Shefi i Rojës Kufitare të Prefekturës Lindore, Eerik Purgel tha se patrulla të shumta zyrtare i ishin përgjigjur incidentit.

Evropa ka rritur vigjilencën pas pranisë së dronëve të paidentifikuar që kanë fluturuar në hapësirën ajrore të NATO-s, duke arritur një shkallë të paprecedent në shtator.

Kjo shtyu liderët evropianë të binin dakord për zhvillimin e një “muri dronësh” përgjatë kufijve të tyre për të zbuluar, gjurmuar dhe lokalizuar avionët e telekomanduar që shkelin hapësirën ajrore evropiane.

LEXONI GJITHASHTU:

• Trump i kërkon Ukrainës të veprojë shpejt: Sa herë që vonohet, Rusia ndryshon mendje
• BE-ja sanksionon tre perëndimorë që përhapnin propagandën ruse: Kush janë ata?