Samiti i liderëve të Ballkanit, Odeta Barbullushi: Potencial për të sjellë 20 mld euro investime në rajon

Në 10 qershor, në Pallatin e Brigadave do të mblidhet Samiti liderëve të vendeve të Ballkanit Perëndimor, samit që vjen pak ditë para vendimit në Bruksel për nisjen e negociatave për Shqipërinë dhe Maqedoninë e Veriut.

Liderët e Ballkanit Perëndimor do të diskutojnë për projektet në rajon të përfituara në kuadër të Procesit të Berlinit, ku i pranishëm do të jetë dhe Komsioneri për Zgjerimin, Oliver Varhelyi.

Krerët e 6 shteteve të Ballkanit perëndimor Shqipëria, Kosova, Serbia, Maqedonia e Veriut, Bosnje Hercegovina dhe Mali i Zi pritet që të koordinojnë kërkesat dhe projektet konkrete për investimet e BE në rajon.

“Në fushën e ndërlidhjes së transportit, transportit rrugor, transporti hekurudhor, teknologjisë, energjisë, në kuadër të këtyre shtyllave Ballkani Perëndimor pritet të ketë 9 miliardë euro investime. Por, plani i investimeve synon të ketë potencialin për të sjellë rreth 20 miliardë euro investime për rajonin”, tha Odeta Barbullushi, këshilltare e kryeministrit Rama.

Vitin e kaluar, takimi i 6 liderëve te Ballkanit Perëndimor u zhvillua online. Ai njihet si Samiti i Sofjes ku u miratua paketa e investimeve për rajonin. Samiti këtë radhë nuk do të jetë më në “Zoom” dhe do të mbahet në Pallatin e Brigadave në Tiranë, 4 javë para mbledhjes së fundit të Procesit të Berlinit.

“Kjo e bën edhe më të domosdoshëm këtë diskutim, i cili do të zhvillohet në datën 10, pikërisht për linjëzimin e ideve dhe projekteve në këto fusha” shtoi znj. Barbullushi.

Por, cili ka qenë përfitimi i Shqipërisë nga Procesi i Berlinit? Ai nisi në 2014 nën iniciativën e kancelares gjermane dhe ndihmon vendet e Ballkanit të bashkëveprojnë rreth projekteve të përbashkëta të financuara nga BE.

“Do të përmendja linjën e interkonjeksionit mes Shqipërisë dhe Maqedonisë së Veriut në fushën e energjisë, mund të përmend segmentin e transportit Tiranë-Aeroport, mbështetja për hidrocentralin e Fierzës apo për ByPass-in e Tiranës”, deklaroi znj. Barbollushi.

Në pritje të konfirmimit nga të gjitha shtetet, ekipet teknike po punojnë për marrëveshje që duhet të firmosen para mbledhjes në Berlin në korrik.