Mulaj zbulon rolin e Ramës në fitoren e Kurtit dhe qasjen e Presidentes Osmani

Gazetarja dhe moderatorja Esmeralda Mulaj ka komentuar në emisionin “Now” zhvillimet pas zgjedhjeve parlamentare të mbajtura dje në Kosovë, të cilat u fituan nga Albin Kurti, një rezultat që ai e cilësoi si një nga fitoret më të mëdha në historinë e vendit.

Sipas Mulajt, rolin kyç në arenën ndërkombëtare gjatë kësaj periudhe e ka pasur presidentja Vjosa Osmani, e cila, sipas saj, ka qenë protagoniste kryesore e suksesit. Ajo theksoi se Osmani ka pasur edhe mbështetjen e kryeministrit të Shqipërisë, Edi Rama, i cili ka dhënë një kontribut të veçantë, veçanërisht pas njoftimit të Bashkimit Evropian për heqjen e masave ndaj Kosovës.

“E vetmja që po luante në arenën ndërkombëtare ishte presidentja Vjosa Osmani. Edhe me ndihmën e Edi Ramës që i dha një kontribut shumë të veçantë. Edhe pse VetëVendosja nuk e pranon, kontributi ishte që momentin kur Bashkimi Evropian njoftoi heqjen e masave. Pamë futjen e Ramës për të dhënë kreditet maksimale Osmanit, dhe mes fushatës ishin kredite dhe vota që shkonin te VetëVendosja. Kjo sepse Osmani ishte rreshtuar hapur jo si presidente, ajo i shkoi kryetarit të sapo zgjedhur të Mitrovicës në zyrë. Refuzoi të bënte një lojë si ajo e Albin Kurtit”, theksoi Mulaj.

Sipas saj, votat e elektoratit të LDK-së që u rikthyen në shkurt, në një masë të madhe i mori Vjosa Osmani drejt Albin Kurtit.

“Protagoniste ishte Vjosa Osmani jo Kurti. Ato votat e LDK-së që arriti ti rikthejë në shkurt, i mori Osmani dhe i çoj te kurti.

Çdo politikan bën kalkulimet e veta, nëse i dalin mirë, bravo i qoftë”, tha Mulaj.