Përfshihet nga flakët kioska në aksin Librazhd-Prrenjas, digjen edhe 2 makina të parkuara

Një zjarr është regjistruar gjatë orëve të para të mëngjesit të sotëm pranë aksit nacional Librazhd-Prrenjas. Mësohet se nga flakët janë përfshirë  një kioskë dhe dy automjete. Sipas njoftimit të MZSH Librazhd, shërbimet zjarrfikëse u njoftuan rreth orës 03:29 dhe ndërhynë menjëherë në vendngjarje.

Si pasojë e flakëve, u dogj plotësisht një kioskë në pronësi të Skënder Gega si edhe dy automjete të parkuara pranë saj. Falë ndërhyrjes së shpejtë të zjarrfikësve, u shpëtuan nga flakët dy kioska të tjera në afërsi dhe një automjet tjetër i parkuar pranë vatrës së zjarrit.

Burime nga MZSH bëjnë me dije se shkaku i zjarrit mbetet ende për t’u përcaktuar. Mes automjeteve të djegura është edhe një mjet me targa greke, në pronësi të një emigranti të kthyer në vendlindje për festat e fundvitit.

Fatmirësisht, nga ngjarja nuk raportohet për persona të lënduar. Në vendngjarje ishin të pranishëm edhe efektivë të Policisë, të cilët kanë nisur hetimet për zbardhjen e plotë të rrethanave të ngjarjes.

“Librazhd/Informacion paraprak. Mëngjesin e sotëm, në fshatin Hotolisht, ka rënë zjarr në minimarketin në pronësi të shtetasit S. G. Si pasojë e flakëve janë shkaktuar dëme materiale në minimarket, si dhe janë djegur dy automjete të parkuara, në pronësi të shtetasve R. S. dhe G. Xh.
Grupi hetimor po punon për përcaktimin e shkakut të rënies së zjarrit”, njofton policia.