Reshjet e borës mbulojnë Qarkun e Elbasanit, vështirësi për qarkullimin në disa akse

Reshjet e dëborës kanë shkaktuar vështirësi në qarkullimin e mjeteve në disa akse rrugore të qarkut Elbasan, konkretisht në aksin Elbasan–Gjinar–Zavalinë dhe Elbasan–Tiranë, në segmentin e vjetër rrugor nga Krraba.

Ndërkohë, në bashkinë Belsh situata paraqitet problematike në disa zona. Sipas informacioneve zyrtare, liqeni kryesor i Belshit ka shënuar rritje të ndjeshme të nivelit të ujit dhe ka dalë nga shtrati. Që prej ditës së djeshme janë hapur portat e shkarkimit për të menaxhuar prurjet e shtuara, ndërsa si pasojë e shkarkimit të digës së Trojasit, aksi rrugor Belsh–Trojas është aktualisht i bllokuar, pasi reshjet vijojnë me intensitet të lartë dhe rruga ndodhet nën ujë.

Autoritetet lokale dhe strukturat e Emergjencave Civile ndodhen në monitorim të vazhdueshëm të situatës dhe u bëjnë thirrje qytetarëve të shmangin lëvizjen në këtë segment rrugor deri në përmirësimin e kushteve dhe normalizimin e situatës. Deri më tani nuk raportohet për banesa apo biznese të përmbytura.

Ndërkohë, zona e Gjinarit është mbuluar nga dëbora, ndërsa autoritetet lokale apelojnë për kujdes dhe këshillojnë drejtuesit e mjeteve që të jenë të pajisur me goma dimërore ose zinxhirë.

Në bashkinë Përrenjas, situata paraqitet e qetë dhe nën kontroll. Të gjitha akset rrugore janë të kalueshme, ndërsa ekipet e punës ndodhen në terren duke monitoruar situatën në mënyrë të vazhdueshme. Deri në këto momente nuk raportohen dëme apo vështirësi për qytetarët.

Sa i përket furnizimit me energji elektrike, në nivel qarku raportohen mbi 700 abonentë po përballen me ndërprerje të energjisë. Konkretisht, fideri 6 i Nënstacionit Librazhd furnizon pjesërisht zonat Borovë, Stërblevë dhe Zabzun; fideri 4, Polis – Nënstacioni Librazhd është pjesërisht në punë në zonat Vilan, Sopot dhe Qafë Dardhë; ndërsa fideri 3 i Nënstacionit Gramsh furnizon pjesërisht zonat Komuna Tunjë, Kushovë dhe Pishaj.

Autoritetet vijojnë monitorimin e situatës, ndërsa ekipet në terren po punojnë për menaxhimin e pasojave të motit të keq dhe rikthimin e normalitetit.