Shtohen rastet e të infektuarve me grip, ISHP vazhdon testimin për personat e dyshuar

Në Shqipëri vijon qarkullimi i viruseve gripale të tipit A, ndërsa nuk është izoluar ende varianti K, i cili konsiderohet më ngjitës. Laboratori i Virologjisë pranë ISHP-së ka testuar, nga 1 tetori deri më tani, mbi 1,700 mostra të dyshuara për grip të tipit A, me nënvariantet H1N1 dhe H3N2.

Ndërsa rastet e gripit dhe virozave të stinës vijojnë të rriten, ekspertët e shëndetit publik apelojnë për kujdes të shtuar.

Të moshuarit, personat me sëmundje kronike, fëmijët dhe gratë shtatzëna, sipas ekspertëve, janë grupet më të rrezikuara për të zhvilluar forma më të rënda të gripit, që mund t’i çojnë drejt shtrimit në spital. Nisur nga eksperienca e viteve të shkuara, pritet që kulmi i sezonit gripal të arrihet në fund të muajit janar, ku shifrat e të infektuarve do të jenë të larta.