Rama: Nuk kthehet lumi në shtrat me protesta, mos kërkoni fajtor imagjinar! Gjendja është e rëndë

Ka nisur mbledhja e kryeministri Edi Rama në Komitetin Ndërministror të Emergjencave Civile lidhur me situatën e përmbytjeve në vend. Të pranishëm në këtë mbledhje do te jetë Ministria e Mbrojtjes, Ministria e Brendshme, Ministria e Financave, Ministria e Energjisë, Infrastrukturës dhe ajo e Bujqësisë. Gjithashtu në mbledhje do të ketë edhe përfaqësues të Agjencisë Kombëtare të Mbrojtjes Civile.

Rama gjatë fjalës së tij u shpreh se reagimet nga opozita në këto kohë përmbytjesh janë të tepërta dhe nuk i japin zgjidhje personave të prekur nga kjo situatë. Sipas tij 1587 banesa janë përmbytur.

“E di që fjala durim mund t’i tingëllojë shumëkujt si një cingërimë e tepërt në vesh, por durimi është i domosdoshëm kur ajo që po përjetojmë nuk është thjesht mot i keq. Shiu nuk ndalet me shpifje, si ato se nuk punojnë hidrovoret; lumenjtë nuk kthehen në shtrat me protesta, si ato kundër ndërtimeve në territore shumë vulnerabël. Retë nuk shpërndahen me slogane. Këto janë thënie që ushqejnë përçarje, jo ndihmë. Në një situatë si kjo nuk kërkohen fajtorë imagjinarë, por ndihmohen njerëzit realë. Njerëzit nuk kanë nevojë për më shumë britma dhe teori konspirative. Kjo është një gjendje e rëndë, por nuk ka prekur vetëm Shqipërinë.” – tha Rama.