Bie zjarr në një pallat në Gjirokastër, shpëtohet e moshuara

Mbrëmjen e sotme në qytetin e Gjirokastrës një banesë në lagje “18 Shtatori” është përfshirë nga flakët.

Sipas raportimeve paraprake, zjarri ka përfshirë një banesë, në katin e parë të një pallati. Ndërsa kanë mbërritur në vendngjarje zjarrfikësit kanë nxjerrë nga banesa një të moshuar rreth 80-vjeçe, e cila është asfiksuar nga tymi. Ajo është transportuar në drejtim të spitalit të Gjirokastrës për ndihmë mjekësore.

Njoftimi i plotë i policisë:

Drejtoria e MZSh Gjirokastër informon se, në orën 17:49, u njoftuam nga Policia e Shtetit për rënien e një zjarri në lagjen “18 Shtatori”, në një pallat, kat i parë.

Menjëherë u nis automjeti zjarrfikës me efektivët përkatës. Me mbërritjen në vendngjarje u konstatua se në banesë ndodhej një e moshuar, shtetasja Cevi Jonuzi, 83 vjeçe, e cila nuk ishte në gjendje të dilte jashtë dhe ndodhej e asfiksuar brenda banesës së përfshirë nga flakët.

Shërbimet zjarrfikëse ndërhynë me shpejtësi, duke bërë të mundur nxjerrjen e të moshuarës nga banesa dhe shoqërimin e saj në urgjencë për dhënien e ndihmës së parë.

Operacioni vijoi me vënien e zjarrit nën kontroll, duke shmangur përhapjen e tij dhe rrezikimin e banesave të tjera. Si pasojë e zjarrit, në banesë pati dëme materiale.