Muzeu Prado rekord vizitorësh në vitin 2025, plan i ri për përmirësimin e përvojës së turistëve

Drejtori i muzeut të artit Prado, Miguel Falomir ka deklaruar se muzeu i artit në Madrid nuk ka nevojë për asnjë vizitor më shumë, pasi vitin e kaluar priti një rekord prej 3.5 milionë njerëzish.

Ai shtoi se muzeu po harton plane për t’u siguruar që muzeu të mos bëhet viktimë e suksesit si Luvri në Paris. Në vitin 2025, Prado u vizitua nga 3,513,402 persona.

“Prado nuk ka nevojë për asnjë vizitor më shumë. Ndihemi rehat me 3.5 milionë. Suksesi i një muzeu mund ta shembë atë, si Luvri, me disa dhoma që bëhen të mbingarkuara. Gjëja e rëndësishme është të mos shembet”, tha ai.

Falomir tha se muzeu kishte nisur një projekt të ri, të quajtur Plan Host, për t’i dhënë përparësi cilësisë mbi sasinë dhe për të provuar të përmirësonte ose të paktën të ruante përvojën e vizitorëve në muze.

‘Nuk mund të jetë si të marrësh metronë në orën e pikut. Nuk mund ta gjykosh një muze nga numri i vizitorëve. Sasia nuk është aq e rëndësishme sa cilësia, duhet të ketë një gamë të larmishme dhe gjithëpërfshirëse vizitorësh”, shtoi ai.

Falomir tha se 65% e vizitorëve vitin e kaluar ishin nga jashtë shtetit dhe ai do të donte të shihte më shumë spanjollë që përfitonin nga një nga thesaret më të mëdha kulturore të vendit.

Ndër planet për përmirësimin e cilësisë së vizitave janë optimizimi i hyrjeve në muze, ripërcaktimi i madhësisë së grupeve të vizitorëve dhe sigurimi që njerëzit të dinë se nuk lejohen të bëjnë fotografi në galeri.