Trump kërkon që shtetet të paguajnë 1 miliard dollarë për të qëndruar në Bordin e Paqes

Administrata e Trump dëshiron që vendet të paguajnë 1 miliard dollarë për të qëndruar në Bordin e Paqes, raportoi të shtunën Bloomberg News, duke cituar një draft-statuti.

Sipas raportit, Presidenti amerikan Donald Trump do të shërbente si kryetari i parë i këtij bordi dhe çdo shtet anëtar do të ketë një mandat jo më të gjatë se tre vjet nga hyrja në fuqi e statutit, me mundësi rinovimi nga kryetari.

Shtëpia e Bardhë e quajti raportin “keqinformues” dhe tha se nuk ka tarifë minimale anëtarësimi për t’iu bashkuar “Bordit të Paqes”.

“Kjo thjesht ofron anëtarësim të përhershëm për vendet partnere që demonstrojnë përkushtim të thellë ndaj paqes, sigurisë dhe prosperitetit,” tha Shtëpia e Bardhë në platformën X.

Departamenti Amerikan i Shtetit, duke iu përgjigjur një pyetjeje të Reuters, iu referua postimeve të mëparshme në rrjetet sociale nga Trump dhe i dërguari i tij i posaçëm Steve Witkoff lidhur me bordin, ku nuk përmendej asnjë shifër.