Tabaku në Konferencën e Kryetarëve: Nxitimi i shumicës për të votuar çdo ligj të qeverisë ‘shkel e shko’ ka kosto për buxhetin

Deputetja e Partisë Demokratike, Jorida Tabaku, ka kërkuar në mbledhjen e Konferencës së Kryetarëve respektimin e rregullores së Kuvendit dhe hapjen e debatit për çdo ligj apo akt normativ që paraqitet për miratim në parlament.

Tabaku u ndal te procesi i integrimit në Bashkimin Europian, duke theksuar se ai është deformuar dhe nuk mund të trajtohet si një proces i njëanshëm, ku opozitës i kërkohet vetëm të votojë ligje të gatshme.

“Këto nuk janë fjalë politike, janë të drejta kushtetuese të opozitës. Është viti i katërt radhazi që përfshihen në kalendar dhe nuk zbatohen”, deklaroi Tabaku, duke e cilësuar të patolerueshëm kufizimin e hapësirës së opozitës dhe paralizimin e mbikëqyrjes parlamentare.

Deputetja demokrate kritikoi edhe raportin e Kuvendit me drejtësinë, duke e quajtur mbylljen e sesionit të kaluar një shembull të keq institucional. Ajo akuzoi mazhorancën se është kthyer në mburojë politike për të penguar zbatimin e vendimeve të institucioneve të drejtësisë, përfshirë edhe ato të Gjykatës Kushtetuese. Sipas saj, mbyllja e sesionit pa u diskutuar mandati i zëvendëskryeministrit tregon qartë qasjen e shumicës ndaj drejtësisë.

Tabaku kërkoi që sesioni i ri parlamentar të nisë me rikthimin e rregullit përmes mbledhjes së Këshillit për Rregulloren dhe Mandatet, duke theksuar se kërkesa e opozitës për kohë, analizë dhe debat për ligjet e integrimit është kusht për cilësi dhe jo pengesë.

“Nxitimi i shumicës për të votuar çdo ligj të qeverisë ‘shkel e shko’ ka kosto për buxhetin dhe për qytetarët shqiptarë”, u shpreh ajo.