Shpërndanin lëndë narkotike, në pranga 50-vjeçari në Korçë, bashkëpunëtori në kërkim

Policia ka vënë në pranga një 50-vjeçar pasi shpërndante lëndë narkotike në qytetin e Korçës. Në kuadër të operacionit të koduar “Drenova”, në pranga ka rënë Mondi Mehmetllari 50 vjeç, banues në Drenovë, Korçë.

Sipas raportimeve nga policia, Mehmetllari bashkëpunonte me shtetasin K. M., alias A. M., 37 vjeç, i cili është shpallur në kërkim.

Njoftimi i plotë i policisë:

“Shpërndante lëndë narkotike, kapet dhe vihet në pranga 50-vjeçari.

Shpallet në kërkim bashkëpunëtori i 50-vjeçarit dhe vijon puna për kapjen e tij.

Sekuestrohet një pako me lëndë narkotike.

Specialistët për Hetimin e Narkotikëve në DVP Korçë, në zbatim të planit të masave të hartuar për vitin 2026, me objektiv parandalimin dhe goditjen e veprimtarisë kriminale në fushën e narkotikëve, bazuar edhe në informacionet e marra në rrugë operative për një shtetas që shpërndante lëndë narkotike në zonën e Korçës, organizuan dhe finalizuan operacionin policor të koduar “Drenova”.

Në kuadër të operacionit u bë kapja dhe arrestimi në flagrancë i shtetasit M. M., 50 vjeç, banues në Drenovë, Korçë.

Në momentin e kapjes, këtij shtetasi iu gjet dhe sekuestrua, në cilësinë e provës materiale, një pako me rreth 104 gramë lëndë narkotike cannabis sativa.

Nga hetimet rezultoi se 50-vjeçari bashkëpunonte me shtetasin K. M., alias A. M., 37 vjeç, banues në Korçë, i cili u shpall në kërkim dhe vijon puna për kapjen e tij.

Në bashkëpunim me Prokurorinë vijon puna për dokumentimin e plotë ligjor të veprimtarisë kriminale të këtyre shtetasve.

Materialet iu referuan Prokurorisë pranë Gjykatës së Juridiksionit të Përgjithshëm Korçë, për veprime të mëtejshme.

Korçë-Në kuadër të operacionit “Drenova” u arrestua Mondi Mehmetllari”, thuhet në njoftim.