Vodhi automjetin gjatë natës së djeshme, arrestohet autori në Vlorë

Policia e Vlorës këtë të dielë ka vënë në pranga autorin e dyshuar për vjedhjen e një automjeti gjatë natës së djeshme. Sipas raportimeve nga policia, pas kallëzimit të marrë nga një shtetase se i kishin vjedhur automjetin, policia ka bërë të mundur arrestimin e autorit.

Në kuadër të operacionit të koduar “Reagimi”, në pranga ka rënë shtetasi S. K., 45 vjeç, banues në Vlorë.

Njoftimi i plotë i policisë:

“Vodhi një automjet gjatë natës; falë reagimit të shpejtë dhe profesional të shërbimeve të Policisë identifikohet, kapet dhe vihet në pranga autori.

Gjendet edhe automjeti që 45-vjeçari vodhi gjatë natës.

Shërbimet e Komisariatit të Policisë Vlorë, pas kallëzimit të marrë nga një shtetase se gjatë natës i kishin vjedhur automjetin, menjëherë organizuan punën për identifikimin dhe kapjen e autorit.

Falë veprimeve të shpejta profesionale, në kuadër të operacionit policor të koduar “Reagimi”, u bë identifikimi dhe arrestimi i shtetasit S. K., 45 vjeç, banues në Vlorë.

Gjithashtu, gjatë operacionit, shërbimet e Policisë gjetën edhe automjetin e vjedhur nga ky shtetas.

Materialet procedurale i kaluan Prokurorisë pranë Gjykatës së Shkallës së Parë Vlorë, për veprime të mëtejshme ligjore, për veprën penale ‘Vjedhja’”, thuhet në njoftim.