VIDEO/ Vlorë, punonjëset shpërthejnë në lot pas shkarkimit të nëndrejtorit të Kadastrës

Atmosferë e tensionuar dhe emocionale u shënua këtë të martë në Kadastrën e Vlorës, ku punonjësit shpërthyen në lot dhe duartrokitje për kolegun e tyre, Sokol Shehaj, i cili u shkarkua nga detyra ditën e djeshme.

Sokol Shehaj, nëndrejtori i Kadastrës, edhe pse jeton në Tiranë dhe familjen e ka aty, sërish doli krah punonjësve duke kundërshtuar urdhërin e zhvendosjes së institucionit drejt kryeqytetit.

Pas këtij qëndrimi, Shehaj u shkarkua nga detyra pa motivacion të qartë. Aludohet se shkarkimi i tij erdhi vetëm për faktin se mbajti anën e kolegëve të tij.

Kujtojmë që pesëdhjetë e pesë punonjës të Kadastrës së Vlorës kanë kundërshtuar sërish vendimin për zhvendosjen e institucionit drejt Tiranës. Prej dy ditësh ata kanë kundërshtuar këtë vendim, i cili sipas tyre ka ardhur në mënyrë të beftë dhe të papritur.

Punonjësit shprehen se zhvendosja është e pamundur për shkak të kushteve familjare, pasi shumica prej tyre kanë familje, prindër dhe fëmijë, çka e bën të pamundur lëvizjen e përditshme apo transferimin drejt Tiranës për të ushtruar detyrën.

Kundërshtimi ka qenë i fortë, madje edhe nëndrejtori i Kadastrës së Vlorës, Sokol Shehaj, është shkarkuar nga detyra pasi ka mbështetur punonjësit.

Ndërkohë, afati i fundit për zhvendosjen është fundi i muajit, periudhë gjatë së cilës duhet të spostohet edhe baza materiale e institucionit. Pas kësaj, sipas punonjësve, mbetet e paqartë se çfarë do të ndodhë me ta.

Ata kërkojnë mbështetje nga mediat, por edhe nga institucionet përgjegjëse, deputetët dhe përfaqësuesit politikë të qytetit të Vlorës.