Schieder komenton protestën e PD: Demokracia nuk arrihet me molotov, gjeni mesin e artë

Raportuesi i Përhershëm i Parlamentit Evropian për Shqipërinë, Andreas Schieder në një konferencë për mediat nga Kryesia e Kuvendit i bëri thirrje aktorëve politikë në vend të kontribuojnë bashkërisht për zhvillimin e demokracisë në vend.

Schieder komentoi protestën e opozitës duke theksuar se demokracia me molotov nuk është pozitive ndërsa shtoi se situata në vend nuk i duket aq dramatike sa perceptohet përmes medias.

“Demokracia me molotov nuk është e mirë. Javën e shkuar pamë fotografi në media për protestat që dukeshin dramatike. Pastaj kur vjen këtu dhe sheh një situatë më pak dramatike. Duhet të jeni të ndërgjegjshëm dhe për perceptimin që prodhoni nga mediat në mendjen e qytetarëve evropianë. E di që demokracia funksionon mirë, që ka debate deri në orën 4 të mëngjesit, dhe që ka hapësirë për opozitën dhe mazhorancën për të diskutuar, është një demokraci normale. Ndonjëherë e ke qejf dikë, ndonjëherë e urren. Por të mos e dramatizojmë më shumë seç duhet. Mendoj që është edhe më e rëndësishme që të gjejmë mesin e artë. Zgjedh funksionimin normal të një demokracie”, tha ai.