Arsenal dominon në transfertë, i shënon 4 gola Leeds-it

Transferta e Leeds-it nuk solli aspak vështirësi për Arsenalin, që mori një tjetër fitore në kampionatin anglez, një duel i përfunduar në shifrat 4-0. Të besuarit e Mikel Artetës dominuan kundërshtarin, të cilin e ndëshkuan dy herë që në fraksionin e parë. Zubimendi zhbllokoi shifrat dhe më pas një autogol i Darlow e çoi rezultatin në 0-2.

Në pjesën e dytë ishte radha e Gyokeres për të shënuar dhe pas tij Gabriel Jesus, që vulosi triumfin 0-4. Një 3-pikësh mjaft i rëndësishëm për Arsenalin, që synon shkëputjen nga Man City.

Tri pikë morën edhe Bournemouth, Chelsea dhe Liverpool. Këta të fundit likuiduan Newcastle 4-1. Ekitike realizoi një dopietë, por rrugën e rrjetës e gjetën edhe Wirtz dhe Konate. Të parët që kaluan përpara ishin “qymyrxhinjtë” me Gordon, më pas të kuqtë përmbysën gjithçka.

Të njëjtën gjë bëri edhe Chelsea në shtëpi ndaj West Ham-it, ku përmbysi shifrat nga 0-2 në 3-2. Bowen dhe Summerville mbyllën pjesën e parë në avantazh të West Ham-it, ndërsa në pjesën e dytë blutë përmbysën në mënyrë spektakolare me golat e Joao Pedro, Cucurella dhe Fernandez. Sfida tjetër e së shtunës, Brighton–Everton, përfundoi në barazim 1-1.