VIDEO/ Berisha paraqitet në SPAK për zbatimin e masës së sigurisë “detyrim paraqitje”

Kryetari i Partisë Demokratike Sali Berisha është paraqitur këtë të hënë në ambientet e SPAK, në zbatim të masës së sigurisë “detyrim paraqitje”. Kjo është paraqitja e tij e parë për muajin shkurt.

Berisha deklaroi se kryeministri Edi Rama ka cënuar sistemin e drejtësisë duke paguar sipas tij, 7 mijë euro kreun e SPAK. Ai e cilësoi kreun e SPAK një mercenar për të bërë gjuetinë ndaj kundërshtarëve politikë.

Berisha theksoi gjithashtu se rregullimin përfundimtar duhet ta bëjë sërish ekzekutivi, por shkeljet e kryera nga Rama ndaj ligjit nuk mund të injorohen.

“Edi Rama ka shkelmuar me dy këmbët e tij ligjin. I ka vu mercenarit të SKAPI-t rrogën 7 mijë euro. Një delinkuenti, se kjo tribunë këtu do të vazhdojë, vetëm kini durim. Një delinkuenti i ka vënë rrugën 7 mijë euro. Atëherë çdo gjykatës i lartë, çdo gjykatës Kushtetues, Prokurori e Përgjithshme kanë të drejtë të ndihen të shkelmuar, të poshtëruar nga qeveria në vendimin e saj.

Nuk them ta rregullojë, nuk mund të them sepse duhet një ekspertizë më e thellë ligjore. Por ka të drejtë ta rrëzojë, absolutisht po. Rregullimin mendoj unë duhet ta bëjë përsëri ekzekutivi, sepse është një kompetencë shumë ekskluzive e ekzekutivit.

Por gjykata për mendimin tim, kur ajo ndërtohet mbi bazë xhepi dhe jo ligji, mbi bazë interesi, të paguaj unë një mercenarë që të bëjë gjahun e kundërshtarëve politikë, atëherë ata kanë të drejtë. Dua të jem i drejtë me ta. Të gjitha këto do ti merrni me shkrim, do të ua shpërndajë zyra”, tha ai.

Berisha akuzohet për korrupsion dhe shpërdorim detyre, në lidhje me aferën e privatizimit të ish-kompleksit “Partizani”. Hetimet ndaj tij janë pjesë e një dosjeje të hapur prej muajsh nga Prokuroria e Posaçme Kundër Korrupsionit.

Berisha e ka mohuar vazhdimisht çdo akuzë, duke i cilësuar ato politike. Avokatët e tij kërkojnë heqjen e masës së sigurisë, duke argumentuar mungesën e provave.