Dyshime për manipulim të votave, Prokuroria Themelore nis hetimet edhe në Podujevë

Prokuroria Themelore në Prishtinë ka njoftuar këtë të hënë se ka nisur mbledhja e provave lidhur me dyshimet për manipulim votash në Podujevë. Sipas njoftimit Prokuroria ka autorizuar Drejtorinë e Hetimeve të Krimeve Ekonomike dhe Korrupsionit, për grumbullimin dhe mbledhjen e provave.

Prokuroria thekson se ekzistojnë dyshime se janë evidentuar parregullsi, përkatësisht mospërputhje në numrin e votave të kandidatëve për deputetë në Kuvendin e Republikës së Kosovës, pas përfundimit të numërimit të votave në komunën e Podujevës.

Prokuroria gjithashtu thekson se së bashku me Policinë e Kosovës mbeten të përkushtuar në luftën kundër kriminalitetit, forcimin e sundimit të ligjit dhe vënien para drejtësisë të të gjithë atyre që bien ndesh me ligjin.

Hetimet janë në zhvillim e sipër, ndërkohë që institucionet përkatëse kanë theksuar rëndësinë e transparencës dhe ndjekjes së procedurave ligjore në procesin e numërimit të votave. Autoritetet në Kosovë kanë marrë ne pyetje qindra njerëz nëpër komuna të ndryshme, dhe kanë ndaluar dhjetëra persona pas dyshimeve për manipulim të votave.