Trump pranon se bisedimet me Iranin vazhdojnë, teksa SHBA-të rrëzuan një dron iranian në Detin Arabik

SHBA-të po negociojnë me Iranin ” tani për tani”, tha të martën Presidenti Donald Trump.

“Edhe ata po negociojnë”, u tha Trump gazetarëve në Shtëpinë e Bardhë, pa dhënë detaje të mëtejshme.

Komentet e tij erdhën pasi një avion luftarak amerikan rrëzoi një dron iranian në Detin Arabik të martën, pasi ky i fundit iu afrua aeroplanmbajtëses USS Abraham Lincoln.

“Ata patën një shans për të bërë diçka pak kohë më parë, dhe nuk funksionoi, dhe ne e bëmë operacionin, Çekani i Mesnatës. Nuk mendoj se ata duan që kjo të ndodhë përsëri, por do të donin të negocionin. Po negociojmë me ta tani”, tha ai.

Ministria e Jashtme e Iranit tha të martën se janë duke u zhvilluar përgatitjet për të zhvilluar bisedime me SHBA-në në ditët në vijim, me konsultime që po vazhdojnë për të përcaktuar vendin e takimit.

“Është bërë një planifikim për të mbajtur bisedimet në ditët në vijim dhe janë duke u zhvilluar konsultime për të përcaktuar vendndodhjen e bisedimeve, të cilat do të shpallen sapo të finalizohen”, tha zëdhënësi Esmail Baghaei.

Më parë, zëdhënësja e Shtëpisë së Bardhë, Karoline Leavitt, tha se i dërguari special i SHBA-së, Steve Witkoff, do të zhvillojë biseda me iranianët më vonë këtë javë.

Sipas raportimeve të shumta, Witkoff kishte planifikuar të takohej me Ministrin e Jashtëm iranian Abbas Araghchi në Stamboll të premten për bisedime mbi programin bërthamor të Iranit.

Megjithatë, Axios raportoi të martën se Irani kërkoi ndryshime në vendndodhje dhe përcaktoi se Teherani dëshiron të ndryshojë formatin.

Raportet sugjeruan se përfaqësues nga Turqia, Egjipti dhe Katari pritej të bashkoheshin në bisedime, por Axios tha se Irani tani po shtyn për të zhvilluar bisedimet drejtpërdrejt. Gjithashtu tha se Teherani dëshiron të zhvendosë vendndodhjen nga Stambolli në Oman.