Momenti kur arrestohen dy të dyshuarit për masakrën me 6 të vrarë në Gjermani (VIDEO)

Dy të dyshuarit për vrasjen e gjashtë personave në Stade, në Gjermaninë veriore, janë neutralizuar dhe arrestuar nga policia, ndërsa momenti i ndërhyrjes është kapur nga një dëshmitar okular.

Siç shihet në pamjet e publikuara nga “Bild”, automjeti me të dyshuarit po lëvizte me shpejtësi të lartë në rrugë, kur drejtuesi i mjetit kuptoi se ishte bllokuar me një postbllok policie dhe nuk kishte rrugëdalje.

Ai ndaloi automjetin dhe menjëherë forca të armatosura policie iu afruan, duke u kërkuar të dyshuarve të zbresin nga makina. Sapo dolën, ata u shtrinë përtokë dhe u arrestuan.

Sipas policisë, gjashtë persona janë vrarë nga të shtënat me armë në një “strehimore për nëna dhe fëmijë” në Stade. Pesë viktimat e para—katër gra dhe një burrë—kanë humbur jetën në vendngjarje, ndërsa një tjetër person ka ndërruar jetë në spital si pasojë e plagëve të marra.

Disa persona të tjerë mbeten të plagosur rëndë dhe ndodhen në gjendje kritike, çka lë të hapur mundësinë për rritjen e numrit të viktimave.

Autoritetet fillimisht arrestuan dy persona, njëri prej të cilëve dyshohet si autori i sulmit, sipas një zëdhënësi të policisë për BBC-në. Më pas u raportua për tre arrestime, ndërsa përfshirja e personit të tretë vijon të hetohet, sipas policisë dhe mediave gjermane.

Sipas transmetuesit publik gjerman ZDF, të shtënat kanë ndodhur pranë një kopshti fëmijësh, ku në momentin e ngjarjes disa fëmijë ndodheshin jashtë ndërtesës, pasi kishin përfunduar mësimin dhe po merreshin nga prindërit.

Sipas raportimeve të “SPIEGEL”, ngjarja dyshohet të ketë ardhur si pasojë e një “krimi pasioni” dhe mosmarrëveshjesh personale mes të dyshuarve dhe një qendre për të mitur. Deri tani, nuk raportohet për motiv politik apo ekstremist.