Gjirokastër, policia rrugore ndëshkon me gjoba 2,436 shoferë gjatë muajin janar

Policia Rrugore e Gjirokastrës këtë të mërkurë ka njoftuar se përgjatë muajit janar ka ndëshkuar me masa administrative 2436 drejtues mjetesh për shkelje të ndryshme të Kodit Rrugor.

Sipas njoftimit, pjesa më e madhe e gjobave me 657 të tilla janë vendosur për shpejtësi tej normave të lejuara, 455 masa administrative janë vendosur për parakalime të gabuara duke vazhduar me 198 masa për mosvënien e rripit të sigurimit, 275 gjoba për shkelje të tjera të Kodit Rrugor,etj.

Masa administrative ka patur ndaj drejtuesve të mjeteve edhe për përdorimin e celularit gjatë drejtimit të automjetit,mosrespektimin e këmbësorëve. Brenda muajit janar janë pezulluar 3 leje drejtimi dhe ka nisur procedimi penal për 2 drejtues mjetesh,për shkelje të rregullave të qarkullimit rrugor. Në këtë sezon dimri vëmendje të veçantë blutë e rrugores po i kushtojnë parandalimit të aksidenteve për shkak të motit të keq.

Për të eviturar aksidentet rrugore policia ka rritur praninë në rrugët kombëtare Tepelenë-Gjirokastër-Kakavije, Kardhiq-Delvinë dhe Përmet-dogana e Tri Urave. Blutë e rrugores apelojnë për kujdes të shtuar nga drejtuesit e mjeteve gjatë lëvizjes në këto ditë dimri.