Tragjedia në Porcari, trupat e familjes Kola mbërrijnë në Shqipëri

Mëngjesin e kësaj të enjte, mbërritën në Shqipëri trupat e pajetë të familjes Kola, të cilët humbën jetën tragjikisht më 4 shkurt në Porcari të Italisë. Kryefamiljari Arti Kola, bashkëshortja e tij Jonida dhe dy fëmijët, Hajdari 22 vjeç dhe Xhesika 15 vjeçe, do të përcillen mesditën e sotme për në banesën e fundit në fshatin Gryksh i Madh të Peqinit, vendlindjen e tyre.

Familjarët ndodhen në gjendje të rënduar, si shëndetësore ashtu edhe psikologjike, dhe herë pas here ambulanca shkon pranë banesës për t’u ardhur në ndihmë personave që humbin ndjenjat.

Sipas hetimeve paraprake italiane, shkak i tragjedisë dyshohet të ketë qenë helmimi nga monoksidi i karbonit, i çliruar nga një kaldajë gazi e vendosur së fundmi në banesë. Trupat iu nënshtruan analizave toksikologjike nga autoritetet italiane përpara se të lejohej transporti drejt Shqipërisë.

Për të mbuluar shpenzimet e kthimit të familjes, vëllai i viktimës, Durim Kola, hapi një fushatë në platformën GoFundMe, e cila brenda pak ditësh siguroi mbi 75 mijë euro nga dhurues të shumtë.

Banesa ku ndodhi ngjarja ishte pronë e Arti Kolës, i cili e kishte blerë rreth tre vite më parë dhe e kishte rikonstruktuar pjesërisht vetë. Arti ishte piktor me profesion, ndërsa djali i tij i madh punonte si elektricist.

Tragjedia ndodhi në mbrëmje, kur vëllai i kryefamiljarit dhe karabinierët, pasi nuk morën përgjigje nga brenda, thyen derën e shtëpisë dhe gjetën katër trupat e shtrirë në tokë. Xhaxhai i fëmijëve, i cili gjithashtu u ndalua nga monoksidi i karbonit, humbi ndjenjat para syve të karabinierëve dhe u transportua në spitalin e Cisanello-s.