18 vite shtet i pavarur, Spiropali: Kosova është një realitet i pakthyeshëm

Ministrja për Europën dhe Punët e Jashtme, Elisa Spiropali ka uruar Kosovën dhe popullin e saj në 18-vjetorin e Pavarësisë. Spiropali në urimin e saj thekson se kjo është një ditë për të kujtuar sakrificën dhe qëndresën e popullit për liri.

Ajo shton se tashmë Kosova është një realitet i pakthyeshëm dhe se Shqipëria qëndron pranë Kosovës me përkushtim të plotë për sigurinë, zhvillimin dhe të ardhmen europiane të dy vendeve.

“Gëzuar Kosovë. Urime 18-Vjetorin e Pavarësisë! Kjo është një ditë që kujton sakrificën, qëndresën dhe vendimin e një populli për të jetuar i lirë. Një rrugë e vështirë, por e drejtë, që çoi te shteti i Kosovës dhe te dinjiteti i qytetarëve të saj.

Kosova sot është një realitet i pakthyeshëm. Me institucione të konsoliduara, me demokraci në zhvillim dhe me një orientim të qartë euroatlantik, ajo vazhdon të ecë përpara, hap pas hapi, me besim dhe përgjegjësi.

Në këtë përvjetor, Shqipëria qëndron pranë Kosovës si motër dhe si aleate, me përkushtim të plotë për sigurinë, zhvillimin dhe të ardhmen tonë europiane. Urime nga zemra për qytetarët e Kosovës dhe për të gjithë ata që e bënë të mundur këtë ditë. Gëzuar Pavarësinë”, uron Spiropali.