David McAllister rikthehet në Tiranë, kë takoi nga mazhoranca dhe kush e pret nga opozita

Kryetari i Komisionit për Çështjet e Jashtme në Parlamentin Evropian, David McAllister, së bashku me nëntë anëtarë të tjerë të PE-së, po zhvillojnë një seri takimesh në Shqipëri.

Takimi i parë u zhvillua me kryetarin e Kuvendit, Niko Peleshi. Më pas, delegacioni do të takohet me deputetët anëtarë të Komisionit të Politikës së Jashtme, si dhe me kryetarët e grupeve parlamentare të Partisë Socialiste, Taulant Balla, dhe Partisë Demokratike, Gazment Bardhi.

Në mbyllje të vizitës, është planifikuar një konferencë për media në orën 13:15.

Kujtojmë David McAllister zbarkoi në Tiranë në pranverën e vitit 2017, kur Shqipëria po përballej me një krizë politike ku së bashku me eurodeputetin Knut Fleckenstein sollën një draft marrëveshje të përgatitur për të zhbllokuar krizën. Ata sollën në tryezë një paketë propozimesh kompromisi që përfshinte sugjerime konkrete për mënyrën se si opozita dhe mazhoranca mund të bashkëpunojnë për zgjedhje, dhe u arrit marrëveshja e famshme e 17 Majit 2017 Rama-Basha, në atë që u quajt “McAllister Plus”, një paketë kompromisi e pranuar nga opozita dhe e mbështetur edhe nga mazhoranca. Opozita vendosi të pranojë propozimin e kompromisit duke lejuar pjesëmarrjen në zgjedhje dhe duke hequr bllokimin, dhe marrëveshja synonte të siguronte garanci për një proces zgjedhor gjithëpërfshirës, përfshirë zgjedhjen e institucioneve të pavarura për procesin. Më në fund, kjo solli zgjidhjen e krizës politike dhe pjesëmarrjen e opozitës në zgjedhjet e vitit 2017.