Avokati i Thaçit: Dëshmia e gjeneralit të NATO-s hedh poshtë pretendimet, Millosheviçi ishte në dijeni për bombardimet

Luka Mishetiç, avokati i ish-presidentit Hashim Thaçi, ka deklaruar se Prokuroria e Specializuar po vazhdon të argumentohet se dëshmitarët ndërkombëtarë nuk ishin të informuar për komunikatat e Ushtrisë Çlirimtare të Kosovës.

Mishetiç përmendi dëshminë e ish-gjeneralit suprem të NATO-s, Wesley Clark, i cili sipas avokatit kishte njoftuar personalisht Sllobodan Millosheviçin për bombardimet në Serbi.

“Prokuroria vazhdon të pretendojë se ndërkombëtarët nuk kishin informacion mbi dokumentet dhe komunikatat e UÇK-së, duke përmendur edhe dëshminë e Clark. Por, në dëshminë e tij për tri takimet e tetorit me Millosheviçin, Clark tha se në këto takime i ishte bërë e qartë Millosheviçit se NATO-ja do të bombardonte vendin nëse nuk ndalonte luftimet ndaj Kosovës. Pra, Millosheviçi ishte i informuar për komunikatat, pasi në fund të ditës Kosova konsiderohej thjesht një provincë e Jugosllavisë”, theksoi Mishetiç.