Rritja e pagës minimale dhe rënia e euros dëmtojnë fasonët, bien shitjet

Rritja e pagës minimale dhe zhvlerësimi i euros kanë thelluar krizën e fasonerive në vend. Sektori, i cili numëron rreth 60 mijë të punësuar, dhe prej vitesh ka pasur peshë në tregun e eksporteve, po regjistron edhe mbyllje të fabrikave të vogla dhe të mesme.  

Mbyllja është reflektuar dhe në rënien e eksporteve të tekstileve e këpucëve në janar, kur eksportet kushtuan 8 miliardë lekë, me rënie vjetore 6%.

Industria fason funksionon me marzhe të ulëta fitimi dhe me kontrata të lidhura kryesisht me tregjet europiane, ku çmimet përcaktohen nga konkurrenca globale. Ndaj çdo rritje e kostove të punës reflektohet menjëherë në strukturën financiare të kompanive.

Paga minimale në janar ishte 25% më e lartë se në 2024 dhe 66 % më e lartë se në 2021, duke synuar rritjen e të ardhurave dhe përmirësimin e standardeve të jetesës. Megjithatë, për fabrikat prodhuese, kjo rritje po përkthehet në një presion të fortë mbi kostot dhe konkurrueshmërinë.

Rritja e pagës minimale nuk ndikon vetëm te paga bazë. Ajo shoqërohet me rritje të kontributeve shoqërore, sigurimeve dhe kostove të tjera të lidhura me fuqinë punëtore. Për një fabrikë me qindra punonjës, ndikimi shumëfishohet, duke e bërë çdo vendim për rritje pagash një barrë të drejtpërdrejtë mbi bilancin financiar.

Kujtojmë se, eksportet e tekstileve e këpucëve vijojnë të jenë grupi më i madh eksportues në vend me 30% të totalit.