Protesta e Opozitës/ Tensione mes policisë dhe deputetëve të PD-së para selisë së partisë

Një situatë tensioni është regjistruar këtë të premte përpara selisë së Partia Demokratike e Shqipërisë, në kuadër të protestës së thirrur nga opozita.

Deputetë të Partisë Demokratike kanë pretenduar se godina e selisë është vendosur në një situatë të ngjashme me “shtetrrethim”, duke akuzuar forcat e rendit për rrethimin e ambientit dhe kontroll të rreptë të hyrje-daljeve.

Të shoqëruar nga Sekretari i Përgjithshëm i PD-së, Flamur Noka, deputetët janë përfshirë në një dialog me efektivët e policisë, ku sipas dëshmitarëve në terren, është dëgjuar thirrja drejtuar përfaqësuesve të opozitës për t’u larguar nga zona.

Sipas pretendimeve të deputetëve demokratë, çdo person që del nga selia po shoqërohet ose ndalohet nga policia. Deri në këto momente, nuk ka një reagim zyrtar nga autoritetet lidhur me akuzat e ngritura.

Situata mbetet e tensionuar, ndërsa mbështetës të opozitës vijojnë të qëndrojnë pranë selisë së partisë.