Rabiot mes rrezikut dhe domosdoshmërisë, alarm për Allegrin para derbit

Një “shpatë e Demokleut” qëndron mbi kokën e Adrien Rabiot. Pas mungesës në mesjavë ndaj Comos për shkak të kartonit të kuq ndaj Pizës, mesfushori francez rikthehet për sfidën në shtëpi kundër Parmës, në një moment delikat për kuqezinjtë.

Rikthimi i tij konsiderohet vendimtar për skuadrën e drejtuar nga Massimiliano Allegri. Së bashku me Modric, Rabiot përfaqëson lidershipin dhe qetësinë që trajneri kërkon në mesfushë. Megjithatë, kartoni i kuq nuk e anulon të verdhin e mëparshëm, duke e lënë francezin një ndëshkim larg pezullimit, vetëm dy javë para derbit.

Shifrat flasin qartë: në shtatë ndeshje pa Rabiot, Milani ka arritur vetëm dy fitore. Ai mungoi edhe në humbjen e vetme sezonale në kampionat, ndaj Cremoneses në javën e parë. Statistika që shtojnë shqetësimin në prag të sfidave vendimtare.

Në 180 minutat që ndajnë kuqezinjtë nga derbi me Interin, Allegri pritet të kërkojë kujdes maksimal nga mesfushori i tij. Prania e Rabiot në qendër është thelbësore, por po aq jetike është edhe aktivizimi i tij në përballjen direkte.

Nëse Milani synon të mbajë gjallë ëndrrën për Scudetto, duhet të sigurojë dy fitore ndaj Parmës dhe Cremoneses, përpara se të luajë gjithçka në derbi. Dhe për ta bërë këtë, Allegri ka nevojë për flamurtarin e tij francez.