Me “Audi” me fenelina policie për të shmangur kontrollet, kapet me armë pa leje 32-vjeçari nga Peqini

Një 32-vjeçar banues në Peqin, është kapur në flagrancë dhe është vënë në pranga nga Policia e Elbasanit, nën akuzën për mbajtje pa leje të armëve.

Shtetasi E.E. u lokalizua në fshatin Bradashesh, duke drejtuar një automjet tip “Audi”, i cili ishte pajisur me fenelina të ngjashme me ato të Policisë, me qëllim kamuflimin si mjet zyrtar dhe shmangien e kontrolleve.

Materialet procedurale për këtë ngjarje janë referuar Prokurorisë pranë Gjykatës së Shkallës së Parë Elbasan për veprat penale të parashikuara nga Kodi Penal.

Njoftimi i policisë

Shërbimet e Komisariatit të Policisë Elbasan, në bashkëpunim me Sektorin e Qarkullimit Rrugor, bazuar në informacionet e siguruara në rrugë operative, organizuan dhe finalizuan operacionin policor të koduar “Kamuflimi”.

Si rezultat i këtij operacioni, u kap në flagrancë dhe u vu në pranga shtetasi E. E., 32 vjeç, banues në Peqin.

Ky shtetas u lokalizua në fshatin Bradashesh, duke drejtuar një automjet tip “Audi”, në pjesën e përparme të të cilit kishte vendosur fenelina të ngjashme me ato të Policisë, me qëllim kamuflimin si mjet zyrtar dhe shmangien e kontrolleve nga shërbimet e Policisë.

Gjatë kontrollit në automjet, shërbimet e Policisë gjetën një armë zjarri pistoletë me fishekë, e cila u sekuestrua në cilësinë e provës materiale, së bashku me fenelinat dhe automjetin.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Mbajtja pa të drejtë e uniformës”, njofton policia.