Si po përgatiten Bill dhe Hillary Clinton për dëshmitë e tyre historike rreth Jeffrey Epstein

Një çerek shekulli pasi u larguan nga Shtëpia e Bardhë, Bill Clinton dhe Hillary Clinton janë vetëm disa orë larg një përballjeje të re ligjore me republikanët e Dhomës së Përfaqësuesve, teksa përgatiten të dëshmojnë në një hetim kongresional mbi abuzuesin e dënuar seksual Jeffrey Epstein, shkruan CNN.

Për familjen Clinton, dëshmitë e kësaj jave përbëjnë një kthesë të fortë. Pas muajsh përpjekjesh për të shmangur paraqitjen, duke e cilësuar hetimin si komplot republikan, ata pranuan të dëshmojnë vetëm pasi Dhoma e Përfaqësuesve po shkonte drejt një votimi dypartiak për t’i shpallur në shpërfillje penale të Kongresit.

Dëshmitë do të zhvillohen në Chappaqua, New York, ku jeton familja Clinton. Hillary Clinton do të paraqitet të enjten, ndërsa Bill Clinton të premten. Vendndodhja u negociua mes avokatit David Kendall dhe përfaqësuesit James Comer, kryetar i Komitetit të Mbikëqyrjes në Dhomën e Përfaqësuesve, për të shmangur thirrjen e një ish-presidenti në Capitol Hill.

“Askush nuk po i akuzon Klintonët për ndonjë shkelje. Thjesht kemi shumë pyetje”, tha Comer.

Familja Clinton është përgatitur për dëshmitë, duke rishikuar periudhën kur Epstein ishte aktiv, por edhe duke planifikuar mbrojtjen dhe strategjinë përballë pyetjeve të mundshme armiqësore.

Bill Clinton ka udhëtuar me avionin privat të Epstein të paktën 16 herë, sipas një vlerësimi të CNN, dhe është fotografuar me gra në dosjet e publikuara nga Departamenti Amerikan i Drejtësisë. Ai është fotografuar edhe me Ghislaine Maxwell, bashkëpunëtoren e Epstein. Hillary Clinton ka deklaruar se nuk e ka takuar kurrë Epstein.

Bill Clinton nuk është akuzuar kurrë për shkelje që lidhen me Epstein. Një zëdhënës i tij ka thënë se ai i ndërpreu lidhjet para arrestimit të Epstein në vitin 2019 dhe nuk ishte në dijeni të krimeve.

Dëshmitë do të filmohen dhe pritet të publikohen disa ditë më pas. Janë rënë dakord pesë tema kryesore për marrjen në pyetje:

• Keqmenaxhimi i dyshuar i hetimit federal ndaj Epstein dhe Maxwell;
• Rrethanat e vdekjes së Epstein në vitin 2019;
• Si mund të luftohen rrjetet e trafikimit seksual;
• Si Epstein dhe Maxwell siguruan favore për të mbrojtur aktivitetet e tyre;
• Shkelje të mundshme etike nga zyrtarë të zgjedhur.

Të mbijetuarit e Epstein kanë theksuar se është e rëndësishme që veçanërisht Bill Clinton të dëshmojë. “Askush nuk duhet të jetë mbi ligjin”, tha avokatja Jennifer Plotkin.

Përplasja politike është zhvilluar në një klimë shumë ndryshe nga betejat e mëparshme të Clintonëve me republikanët, përfshirë shkarkimin e Bill Clinton apo hetimet ndaj Hillary Clinton për serverin privat të email-it.

Disa demokratë iu bashkuan republikanëve për të mbështetur procedurën për shpërfillje të Kongresit, duke argumentuar se duhej ruajtur autoriteti i thirrjeve zyrtare dhe se të mbijetuarit meritonin transparencë.

Pas përshkallëzimit të situatës dhe çimit përpara të kërkesës për shpërfillje penale, Clintonët pranuan kushtet e dëshmisë së Comer dhe procedura u anulua. “Klintonët u dorëzuan plotësisht”, deklaroi Comer.

Ndërkohë, republikanët përshëndetën arritjen e dëshmive, por disa aleatë të Donald Trump kanë shprehur shqetësim se një Kongres i ardhshëm i kontrolluar nga demokratët mund të përdorë të njëjtin precedent për të thirrur Trumpin ose familjen e tij.

“E urrej ta shoh, në shumë mënyra”, tha Trump kur u pyet për çështjen.

Të mbijetuarit paralajmërojnë se nëse Clintonët do të kishin refuzuar një thirrje zyrtare, kjo do të krijonte precedent për të tjerë që të shmangnin dëshminë.

Megjithatë, disa kërkojnë që hetimi të mos kufizohet vetëm te familja Clinton. “Pse fokusi është vetëm te familja Clinton? Pse nuk po merret informacion nga një gamë më e gjerë personash?” tha një nga të mbijetuarat./ CNN