Pasojat e bllokimit të rrugës në Librazhd ndihen tek bizneset në Korçë

Bllokimi i rrugës Pogradec – Librazhd ka sjellë rënie maksimale të turizmit në gjithë juglindjen e vendit, aq sa në dy javët e fundit operatorët turistikë bëjnë të ditur se hotelet dhe bujtinat i kanë patur bosh.

Paniku i operatorëve turistik është koha e bllokimit të kësaj rruge pasi ka sjellë anulimet e rezervimeve me turistët vendas por frika më e madhe është anulimi i rezervimeve nga agjenci turistike me turistë të huaj që kanë prenotuar më herët për javët e muajit në vazhdim.

“Fundjava që kaluam vendosi shifra rekord negative, dy bujtinat kanë patur 0 dhoma. Rruga, dihet pasoja. Frikë është pak, është tmerr. Ta imagjinosh që ne po përgatitemi për sezonin turistik, nuk diskutohet vetëm turizmi vendas por diskutohet e turizmi i huaj, agjencitë mund të bëjnë anulime”, tha Edi Bilo, Operator turistik.

“Dy javët e fundit turizmi ka qenë inekzistent, anulime masive. Na shqetësojnë festat e Marsit sepse kemi anulime, frika është e madhe dhe vetë klientët japin motivacion rrugën. Gjithë anulimet kanë qenë nga klientë vendas, kemi edhe njerëz nga Bullgaria e Greqia dhe kanë anuluar”, tha Eriketa Koçollari – Operatore turistike

Bllokimi i kësaj rruge ka anuluar rezervime edhe në Pogradec por dhe fshatra turistike të Voskopojës e Dardhës.